今天請四年四班張欣揚同學為大家朗讀文章。
臺中市107年度語文競賽初賽、複賽閩南語朗讀(國小組)
01公園 游勝榮
這站仔，阮兜附近的榮星公園實在是有夠鬧熱的啦！因為舊矸仔貯新酒、舊店仔賣新貨！市政府佇舊年尾，共耍甲強強欲臭殕去的兒童遊樂區，攏重整理過，真緊就隨閣開放予逐家𨑨迌矣！
新的設施，毋但有規大片的塑膠地毯、一大窟的幼沙仔，閣有增加誠濟好耍的物件，親像講上蓋新型的趨流籠、空中行吊索、吊雙環啦……，有幾若項，攏是囡仔人上佮意耍的。
這層予人歡喜的代誌，電視新聞嘛有報過幾若擺。來遮耍過的人閣常在佇網路頂懸食好鬥相報，所以講，無論是遠路抑近路、大漢抑細漢，誠濟人攏會曉欲𤆬囡仔來遮𨑨迌，逐个攏嘛耍甲歡頭喜面笑咍咍。
若是拄著歇睏日仔，彼誠實會驚倒人，會使講是人山人海、洘秫秫，有當時仔連欲徛都強欲揣無位。有一半个仔閣較古錐，規氣共『thiàn-tooh』順紲紮來，中晝閣叫人共便當送到位。就按呢，大細漢囡仔食晝、睏晝攏佇遮做一擺解決，真正是一兼二顧，實在是有夠心適的啦！毋但大人滿意，囡仔閣較免講，來遮耍一擺就牢咧，定定嘛看囡仔走咧予大人逐。大人喝規晡，囡仔都欲若毋咧，叫攏叫袂振動。若無就是佇遐張、佇遐躽，佇遐吼毋轉去。這嘛莫怪，定定攏予人關佇厝裡，若𤆬出來耍，當然嘛像鳥仔放出籠，四界硞硞傱。
會記得做囡仔的時陣，和厝邊隔壁的囡仔伴耍的，若毋是拍干樂、擉珠仔、搧尪仔標，就是灌杜猴、欱蝶仔、釣四跤仔，有的無的，耍法是加偌趣味咧，哪有像這馬的都市囡仔，會當耍的極加嘛是遮的遊樂設施爾，看著一點仔趣味都無。是講囡仔有通耍就好，一時風駛一時船，時代咧變、囡仔的耍法咧變，咱的想法嘛愛綴咧變，若無是會予人笑咱是老古板呢！
毋管時代按怎變，囡仔仝款攏是爸母的糖霜丸，看市政府重整理榮星公園予囡仔耍、看大人閣願意陪囡仔出來耍，看甲我這个退休的阿伯仔嘛綴咧變少年，綴咧「老人食麻油」──鬧熱啦！
檔讀語音檔https://drive.google.com/open?id=1gJgSZvzAGJEAKwJf_pzKpYC4hnAbeY3f
