劇本
阿榮踅夜市
此起彼落的叫賣聲~
花枝: Hello! 我是人比花枝較媠的花枝娘。好食的花枝意麵佇遮，等你來喔!
豆花店老闆娘: 謼，輸人毋輸陣，輸陣歹看面。豆花、豆花，好食的豆花來囉! 毋管你是欲加紅豆、綠豆、大塗豆、芋圓、粉圓、番薯圓，好料的攏佇遮。燒的、冷的，攏總有喔!
肉粽伯: 燒肉粽、燒肉粽…，好食的燒肉粽閣來囉! 無好食嘛愛錢喔! (唱燒肉粽啊! 燒肉粽，賣燒肉粽。)
這工暗時，阿榮和阿姊去踅台中上大的夜市仔-逢甲夜市。
阿榮和阿姊那唱歌那行出來，喙裡那哼:「來去，來去，咱做伙來去踅夜市。Yeh!」
阿榮: 阿姊，你看夜市仔有足濟好食物仔，看甲我喙瀾強欲流出來矣。有花枝意麵、豆花、閣有…。
阿姊: 謼，你足吵的呢！我欲去買一寡家己的物件，你莫愛哭閣愛綴路，你家己先去揣食的，等一下才約所在相等。
阿榮: 好，阿姊，錢… (阿姊提出「錢來也」的掛牌，共掛佇阿榮的身軀頂)
阿榮誠愛食意麵，嘛愛食花枝。伊看著一个麵擔仔，看板頂懸寫「花枝意麵」。
阿榮:「欸……讚喔！花枝佮意麵這兩項攏是我愛食的，閣毋捌食過花枝意麵，來食看覓咧。」
伊就行倚去，共頭家娘講:「花枝意麵來一碗。」
老闆娘: 好，人客請坐，隨來喔！
頭家娘一下仔就捀一碗麵過來矣。阿榮誠歡喜，一喙食過一喙，食甲咂咂叫，毋過食規晡，食無半塊花枝，伊佇碗裡遮抐遐抐，抐來抐去，嘛是抐無。心內起憢疑，
阿榮:「花枝咧？敢講頭家娘袂記得囥？敢會是頭家娘共我唬？」伊愈想愈氣，就捀彼碗麵去共頭家娘問，
阿榮: 頭家娘，哪會花枝意麵無食著半塊仔花枝？你無老實啦！
老闆娘笑笑地說: ：「啊，哈哈哈…歹勢啦！花枝是我的名啦！」
豆花店老闆娘: 唉呦! 賣物件無老實，消費者啊! 你就愛看清楚喔! (拉起「消費者保護法」布條)
一聽頭家娘按呢講，伊感覺歹勢，只好鼻仔摸咧，緊共賰的意麵食食咧，錢納納咧就緊走矣。
伊行啊行，來到一間豆花擔。伊想講拄才仔燒麵才食煞，這馬來一碗冰的豆花來降溫一下。
豆花妹: 「人客，來坐喔! 阮遮賣的是頂港有名聲，下港上出名的豆花。燒的、冷的在你點，保證你食甲滿面全豆花。」
伊共賣豆花的小姐講，
阿榮:「我欲一碗冰的」。
可能『豆花妹』聽重耽去，捀來的是一碗燒的。伊一看著衝煙的豆花，
心內想講「哪會遮衰，連豆花都出問題。敢會『豆花妹』聽無台語? 無，我就透濫國語共講，「小姐，你捀毋著去矣，『服務』誠䆀！我欲『冰的』。」
小姐一聽著伊講欲反桌，隨叫阿母出來趕人客。
老闆娘: 啥! 你講你欲反桌，按呢我欲叫警察來喔!
警察跳舞進場~
警察:「反桌」? 『「冰的」沒有什麼不好啊! 』頭家娘，我嘛欲一碗『冰的』。
警察跳舞出場~
阿榮豆花食無閣滿面全豆花見笑甲緊旋。伊想講，「今仔日賣食的真正是袂食tsit。無要緊，我來買看有啥物穿的、用的無？」當伊按呢想，伊目睭去影著一个足成二伯的人。伊想講，
阿榮: 二伯上疼我，好空來矣，二伯會在我買。毋管我欲買啥，二伯攏會買予我。伊就三步做一步緊走倚(阿榮做跟蹤二伯狀: 二伯走幾步停下來，他就偷跟幾步)。伊接近二伯的時，閣大聲喝，
「二伯」彼个人頭斡過來，伊才發覺，死矣，原來伊認毋著人矣！伊只好繼續行，繼續念「二八、二九、三十、三十一……」行過一大節路，才敢停落來歇喘。
花枝食無、豆花捙倒擔閣目睭花花，匏仔看做菜瓜，半路認二伯，有夠衰。伊心內緊欲揣阿姊。一看著，
伊大聲喝講「阿姊你是去佗位？」想袂到，阿姊共睨，罵伊講，
「無禮貌，哪會當講我死去佗位？」
阿榮:「阿姊，歹勢啦! 我拄才有夠衰，種匏瓜生菜瓜。豆花食無，腹肚猶咧枵。你看，你看，遐有臭豆腐、蚵仔煎，閣有、閣有…。」
阿姊: hóo! 你真正是喙飽目睭枵neh！好啦! 欲食好料的綴我來。
阿榮: 多謝阿姊!
阿姊: 莫閣叫我阿姊，叫我『姊姊』。
