今天請六年三班的劉平勝和史永紘同學跟玫秀老師一起說故事給大家聽喔!
獅佮鳥鼠
獅佮鳥鼠
今仔日，咱欲講一个「獅佮鳥鼠」的故事。
口白: 樹林內的動物恬恬跔佇草仔邊，獅覆佇樹仔跤咧睏。有一隻鳥鼠對樹仔頂跋落來，(配音: 鼠叫聲) 共睏甲kōng kōng 叫的獅仔吵精神，獅仔誠受氣。
獅: (配音: 獅吼聲) 是啥人遮好大膽，敢攪擾我睏中晝?
鳥鼠: 死矣! 緊旋喔!
獅: 好膽莫走! (配音: 獅吼聲)
鳥鼠 (咇咇掣): 獅…獅…獅仔大王，我毋是刁故意的。拜託你饒我一命，另工我一定會報答你。
獅: 哈哈哈，你這隻鳥鼠遮爾細隻，哪有法度通報恩?
鳥鼠: 獅仔大王，請你相信我，我一定會報答你啦!
獅 (共鳥鼠放開): 共你拆食落腹嘛無夠我窒齒縫。好啦! 看你可憐，我就放你一條生路。
鳥鼠 (那退後，那行禮): 多謝大王! 多謝大王!
口白: 日子一工一工過。有一工，獅仔去予拍獵的網仔網著，袂振袂動。
獅 (倚佇舞台中央，予網仔網牢咧): 救命喔! 救命喔!
口白: 鳥鼠一聽著獅仔咧喝的聲音，跤步隨停落來。
鳥鼠 (共手囥佇耳空邊，做出聽聲音的姿勢): 是「啥人」咧喝救命? 啊! 是獅仔大王。獅仔大王，我來救你矣! 『老鼠超人，出動!』
(配「星際大戰」音樂，老鼠發出吱吱叫聲 + 咬斷網子。)
獅仔大王，我共網仔咬破矣，你緊出來。
獅: 鳥鼠仔，真感謝你。較早我看你無點，真失禮，想袂到「小卒仔嘛會變英雄」，你真正是我的救命恩人!
鳥鼠: 獅仔大王，莫按呢講啦! 我會歹勢呢!
佇這个故事內底，原本予人看無的鳥鼠，這遍真正是「烏矸仔貯豆油-看袂出」，用伊上利的喙齒共網仔咬破，救出獅仔大王。俗語講:「食人一口，報人一斗。」也就是接受人的恩情，若是有機會就要『加倍奉還』。獅仔大王展現伊仁慈、善良的一面，嘛等於是救家己一命。「人情留一線，日後好相看。」-『給別人留餘地，就是給自己留後路喔!』
今仔日，咱的故事就講到遮。多謝逐家的收聽!
